ODG ACLIF PAR OTIGNÎ PAL FURLAN STES TRATAMENT IN RAI DAL LADIN

by | Jug 12, 2021 | 0 comments

Il president Maurmair al à tratât lis liniis di azion pal an a vignì e al à dât il benvignût a 5 gnûfs Comuns che a puartin a 132 lis aministrazions rapresentadis de Assemblee

La Comunitât linguistiche furlane (Aclif), dade adun vuê in sale Aiaç a Udin, e à aprovât un ordin dal dì che al à rimarcât “la impuartance che il palinsest dai programs radiotelevisîfs de Rai al tegni cont des specificitâts culturâls e linguistichis de popolazion furlane” domandant l’impegn “par che ancje pe comunitât furlane si puedi rivâ in maniere graduâl a un servizi almancul compagn a chel che al caraterize la comunitât ladine de provincie di Bolzan: la Rai pe Provincie autonome di Bolzan e previôt une convenzion che e conte 100 oris anuâls di trasmissions televisivis e 352 oris anuâls di trasmissions radiofonichis in lenghe ladine”.

La domande par une gnove Convenzion tra la Rai e la Presidence dal Consei di ministris che e rivi a garantî nivei di tutele domandâts de comunitât furlanofone e je stade rimarcade dal president di Aclif Markus Maurmair ae presince dal assessôr regjonâl aes Lenghis minoritariis Pierpaolo Roberti (al è intervignût in vdc ancje il president dal Consei regjonâl Piero Mauro Zanin).

Inte ocasion Roberti al à visât che “la Rai si jere impegnade par une gnove Convenzion cun definidis carateristichis di tutele, concuardâts ancje in graciis dal Corecom, che a previodevin implementazion di risorsis e di programazion in lenghe furlane e si sin cjatâts invezit une proroghe. Chel prin risultât otignût cul at integratîf che al à viert la vie ae programazion televisive e jere impuartant, ma nol pues jessi il pont di rivade: o volìn – al à afermât Roberts – une plene ecuiparazion de tutele dal furlan cun chê dal sloven, o volìn che si invii ancje la informazion televisive in lenghe furlane. Il percors par rivâ ai nestris obietîfs di tutele e je fat di pas graduâi, ma cumò nol pues vê altris ralentaments”.

Ancje a pet dal ordin dal dì de Assemblee, che e à interpelât la Regjon su une schirie di cuistions, Roberti al à garantît il massim e costant impegn inte tutele e promozion de lenghe e culture furlane.

“Il gnûf Plan di politiche linguistiche, aromai scjadût, al è destinât e al è pront pe aprovazion preliminâr. Al è stât metût in calendari in mût che al podarà jessi ogjet di confront cuant che si fasaran lis trê conferencis regjonâls sul stât di atuazion des leçs di tutele, saltadis intal 2020 par vie de pandemie: al è un document preparât de Agjenzie regjonâl pe lenghe furlane e de direzion Autonomiis locâls ma che e cjape tante part di vore des direzions regjonâls – istruzion, infrastruturis, e-government. Za cul assestament ciertis normis a van a concretizâ cetant previodût dal Plan, par esempli i 250mila euro di trasferiments a Arlef pe cartelonistiche in lenghe furlane”.

Intal cors de assemblee Maurmair al à dât cont des gnovis adesions ae Comunitât che a tocjin vuê al cuote 132: i Comuns di Spilimberc, Codroip, Pavia, Rigulât e Sant Vît di Feagne.
Inte relazion il president al à ancje fat un pont des ativitâts fatis fin cumò e dai invistiments metûts in vore cul contribût de Regjon (75mila euro pal 2020, confermâts intal 2021): la organizazion de Cunvigne Rai e lis lenghis minoritariis, la ativazion de segretarie in plante stabile e l’inviament dal sît internet e dal servizi comunicazion, la promozion “Plui furlan in Rai”; tra lis ativitâts pe Sierade a son previodudis ciertis iniziativis sui medie (l’inviament di un program su Telefriuli cul coinvolziment des aministrazions comunâls), la organizazion di une cunvigne sul furlan inte aministrazion publiche, il cors par aministradôrs, la segretarie telefoniche bilengâl pai Comuns gjestide di Radio Onde Furlane.
I comuns che a fasaran domande – fin cumò a àn aderît za Cjistielgnûf, Pavia, Morsan, Voleson Darzin – a podaran fâsi regjistrâ la rispueste telefoniche automatiche pe segretarie telefoniche ancje in lenghe furlane. “E je une iniziative semplice e che e je dibant pes aministrazions ma che e  pues vê un significât simbolic impuartant: che la dignitât linguistiche dal furlan intune istituzion publiche e je compagne a chê dal talian. Il gno invît duncje ai Comuns – al à afermât Maurmair – al è di fâ domande: pai utents no je pierdite di timp parcè che dopo il messaç inziâl di salût si pues sielzi la lenghe di preference daurman”.
“E continuarà la pression su lis istituzions par otignî une Convenzion Rai-Guvier ae altece dal furlan e la nestre campagne di adesions par fâ la Assemblee simpri plui rapresentative de comunitât”, al à concludût Maurmair inte assemblee che e à votât ae unanimitât il belanç.