“Il furlan e altris lenghis minoritariis te aministrazion publiche”

,
“Il furlan e altris lenghis minoritariis te aministrazion publiche”

Comuns furlans fasêt come in Val di Aoste: concors publics cun prove in lenghe locȃl e liste regjonȃl dai segretariis; par la scuele model ladin cun il furlan lenghe veicolȃr. I stimui de cunvigne “Il furlan e altris lenghis minoritariis te aministrazion publiche” inmaneȃt da ACLiF.

Une prove di cognossince dal furlan par il par il personȃl dal Stȃt, come i Carabinîrs, che  a fasin servizi in Friûl. Concors publics cune une part dai ponts atribuide su la fonde de cognossince dal furlan.

No son prospetivis di fantasie, ma cundizions biel za presintis par altris minorancis linguistichis tant che i francês de Val di Aoste cence rivȃ a formis di tutele ancjemò plui fuartis come i Sudtirôl dulà che i concors publics dai ents locȃi a son organizȃts su fonde linguistiche: une percentuȃl di puescj dome par i todescs, une dome par i talians e une dome par i ladins seont de composizion de popolazion dal Comun o de Provincie. Une prospetive no fine a se stesse, ma par vê une publiche aministrazion plui dongje dai citadins che a vi fan riferiment.

La cunvigne “Il furlan e altris lenghis minoritariis te aministrazion publiche” inmaneade vinars ai 12 di Novembar de ACLiF, la Assemblee de Comunitȃt Linguistiche furlane, a Vile Russiz di Caprive, ospits dal Comun vuidȃt dal sindic Daniele Sergon, e à metût a confront, in presince e in colegament, aministradôrs publics di Friûl Vignesie Julie, Trentin, Sudtirôl e Val di Aoste par stiçâ i aministradôrs publics, soredut chei furlans, a promovi l’ûs de lenghe locȃl in tai rapuarts cun i citadins.

“In Friûl a son esperiencis interessantis, come chê dal cuarp di Polizie locȃl di Tumieç che al rispuint par furlan al telefon, ma covente une planificazion di chestis iniziativis par rindilis organichis. Par esempli ARLeF e à publicȃt di pôc un bant par la segnaletiche  e i Comuns partecipants a son cirche 130 e a coincidin cun chei aderents a la ACLiF” al à dit vie pai lavôrs il president de Agjenzie par la lenghe furlane Eros Cisilino.

LADINS

Giuseppe Detomas, Procuradôr dal Comun gjenerâl di Fascia, uniche realtȃt sorecomunȃl ricognossude cun leç costituzionȃl tal 2006, che e zonte 6 Comuns ladins de Val di Fasse e al da servizis scolastics, ambientȃi, urbanistics e culturȃi al à fevelȃt de discrepance jenfri lis normis di tutele e la lôr aplicazion, tant al è vêr che i ladins a son ancjemò in spiete de cjarte di identitȃt bilengȃl, par chest l’impegn al à di sei continui.

SUDTIROLÊS

Magdalena Amhof, Presidente de Comission Afȃrs istituzionȃi de provincie di Bolzan e à ricuardȃt i pilastris de tutele de popolazion todescje dal Sudtirôl che partissin dal censiment dulà che i maiôrs, ancje i imigrȃts e i  gnûfs residents, a an di declarȃ la lôr partignince a un grup linguistic (talian, todesc e ladin) e su chê fonde si assum personȃl tes publichis aministrazions e a si dan servizis. Un sisteme dal sigûr rigjit e simpri ogjet di dibatit – a à ricognossût Amhof – ma che fin al dì di vuê al è rivȃt a mantegni la pacifiche colaborazion jenfri lis diviersis componentis de societȃt dal Sudtirôl.

VALDOSTANS

Luciano Caveri, za europarlamentȃr e sotsegretari cun deleghe a lis minorancis linguistichis, al à sburtȃt i aministradôrs furlans a creȃ, come in Val di Aoste, une liste regjonȃl dai segretariis comunȃi, une robe fatibile par vie che  lis dôs regjons a an autonomie in te organizazion dai ents locȃi e si podaressin fȃ concors publics cun prioritȃt par cui che al cognòs il furlan.

SLOVENS

Rivant a cjase nestre  Erika Hrovatin, titolȃr di Posizion Organizative dal Ufici

Centrȃl par la lenghe slovene, creȃt de Regjon tal 2015, e à ricuardȃt che a chel a fasin riferiment 32 ents jenfri Comuns, Aziendis Sanitariis e Cjamaris di Cumierç e che in 6 Comuns de Regjon al esist il bilinguisim perfet, dulà che ducj i ats a son scrits par sloven e par talian. L’Ufici ufrìs servizis di interpretariȃt, studi e consulence e dal 2018 al è il riferiment de rêt jenfri ents che ur permet di acedi a fonts suplementȃts par l’ûs dal sloven: une esperience che e sta permetint ai Comuns cun une minorance slovene di sintîsi plui unîts – e à spiegȃt Hrovatin

FRIULANS

Lis prospetivis par l’ûs dal furlan te publiche aministrazion son stadis ilustradis di Enrico Torresin de ARLeF che al à fevelȃt dai 3 progjets obietîf previodûts dal gnûf Plan di Politiche Linguistiche par il furlan fat bon di resint e che al à fat riferiment ancje l’assessôr regjonȃl a lis lenghis minoritariis Pierpaolo Roberti che al à puartȃt un salût regjstrȃt parcè che al ere impegnȃt tai lavôrs de Conference regjonȃl par la lenghe slovene: Roberti al à ricuardȃt che la specialitȃt regjonȃl e je fondade unichementri su la presince di minorancis linguistichis e si à di tutelȃ e promovi; par chest la Regjon e à varȃt il Plan regjonȃl par il furlan che al previôt intervents par 5 milions di euro par an par i 5 agns che a vegnin, lant plui in là de fin di cheste legjislature.

I 3 progjets obietîf dal Plan di Politiche linguistiche par il furlan par chel che a inten la publiche aministrazion a rivuardin i segnȃi stradȃi e dai uficis, la formazion dal personȃl par la cognossince de lenghe e di dirits linguistics e i servizis par i sîts internet e altris tecnologjis. A chest rivuart il president de ACLiF Markus Maurmair al à ricuardȃt che la Assemblee e à realizȃt un rispuindidôr automatic che al è a disposizion dai Comuns e che al à za vût 14 sotscrizions di bande di aministrazions locȃls, in curt – al à zontȃt Maurmair – ACLiF produsarà un vessil che al podarà sei usȃt dai sindics in tes manifestazions uficiȃls.

L’intervent finȃl de cunvigne al è stȃt chel dal President dal Consei regjonȃl dal Friûl Vignesie Julie Piero Mauro Zanin che al à riclamȃt la impuartance de tutele des minorancis linguistichis ancje da un pont di viste de promozion dal teritori e dal svilup inteletîf parcè che la cognossince di plusôrs lenghis slargje lis capacitȃt cognitivis. Par i furlans – al à dit Zanin – podarès lȃ ben un model compagn a che de scuele ladine che al previôt, al mancul in tes elementȃrs, di doprȃ un alternance talian e ladin tant che lenghis veicolȃrs di insegnament

“Al è stȃt un incuintri une vore operatîf cun tancj stimui” e a comentȃt a la fi Alessandra Vanone dal diretîf ACLiF che e à condusût i lavôrs cun il president Maurmair.

“O vin vût la conferme che o vin di stiçâ la domande di dirits linguistics di bande dai citadins, mantignint la rote viers la tutele dal furlan in te ativitȃt de publiche aministrazion cence esitazions e pendolaments comprendint che podin dȃ  un contribût determinant par la tutele de nestre autonomie come Regjon, di cheste autonomie a vegnin fûr cetantis oportunitȃts par i nestris citadins. La cunvigne e a metût in lûs peculiaritȃts e contescj di imitȃ come tal cȃs de liste regjonȃl dai segretariis comunȃi” al à sierȃt Maurmair ricuardant che il prossim apontament di ACLiF al sarà un cors sui dirits linguistics par aministradôrs e personȃl dai ents locȃi.

 

Tag

,

Postato il

14 Novembre, 2021

Invia commento

Il tuo indirizzo email non sarà pubblicato. I campi obbligatori sono contrassegnati *