I sindics de ACLiF a triplichin i sfuarçs par une RAI plui furlane. Prontadis trê letaris pe Regjon, pe emitent e pe Presidence dal Consei dai Ministris. Vie pe assemblee dal organisim, pandudis anticipazions impuartantis su la gnove convenzion pes trasmissions in lenghe furlane.

by | Fev 2, 2020

I sindics de ACLiF a tornin a cjapâ in man la pene par domandâi ae RAI il rispiet di ce che a previodin lis leçs talianis in merit ae presince de lenghe furlane intal servizi radiotelevisîf public. Di fat, i prins citadins de Assemblee de Comunitât Linguistiche Furlane, che e met dongje vuê cirche 120 Comuns, a scrivaran une letare par vê tal Avrîl che al ven – cuant che e sarà in scjadince la proroghe de vecje e no suficiente  convenzion – un gnûf document dulà che si varà di definî une presince plui fuarte de lenghe furlane intes trasmissions RAI, cul stanziament des risorsis che a coventin de bande dal Guvier talian, scomençant dai programs televisîfs che vuê no proponin nuie di ce che a previodin la leç taliane 483 dal 1999 e lis convenzions internazionâls par une minorance come chê furlane.

La iniziative e je stade presentade in ocasion de assemblee de ACLiF che si è tignude a Udin, tal Palaç Belgrado. Dilunc dai lavôrs, il president de Assemblee Markus Maurmair al à comunicât il risultât di un incuintri cul responsabil de RAI incjariât di scrivi la gnove convenzion e indulà che a jerin presints ancje i dirigjents de ARLeF e de Filologjiche, anticipant cualchi contignût dal acuardi jenfri la emitent publiche e la Presidence dal Consei dai Ministris in cont de lenghe furlane: “Prime di dut – al à dit Maurmair – la prossime convenzion e sarà dome pal Friûl – Vignesie Julie e in particolâr pal furlan e pal sloven, e no come chê di prime in comun cu la Val di Aoste. Cun di plui, e je stade pandude la volontât di sprolungjâ di 3 a 5 agns la durade de convenzion par vê plui pussibilitât di programazion. Par finî, e je ancje la promesse che la Presidence dal Consei dai Ministris e darà plui risorsis ae RAI par permeti – si augure il president de ACLiF – une presince informative par furlan in television”.

Dal incuintri cul dirigjent RAI e je vignude fûr ancje la impuartance de azion dai 76 sindics che l’an passât a àn firmade une letare par domandâi ae RAI il rispiet de leç su la presince de lenghe furlane intes trasmissions de emitent: “Nus àn fat capî che chest al è il moment di tornâ a fâ sintî la nestre vôs, e par chest il diretîf de ACLiF al à prontât trê letaris diferentis: une di inviâ ae Regjon Friûl – Vignesie Julie, une ae RAI e une ae Presidence dal Consei dai Ministris par domandâ cualchi incuintri, in mût che ogni istituzion si cjapi i siei impegns in merit aes richiestis de ACLiF”, al à continuât Maurmair ricuardant l’obietîf minim di otignî un spazi informatîf cuotidian par furlan di 5 minûts ae fin dal telegjornâl regjonâl des 7 e 30 sore sere. La ACLiF e domandarà su chest un incuintri cun Andrea Martella, sot segretari ae Presidence dal Consei dai Ministris cun deleghe ae Informazion e ae Editorie, che – par altri –  al è di Puart.

Vie pe assemblee de ACLiF si à fevelât ancje de segnaletiche stradâl par furlan che e je previodude in maniere clare de Leç regjonâl 29 dal 2007 pai Comuns cun comunitâts furlanofonis tuteladis de leç, e dut câs istès ostacolade dai uficis di cualchi Polizie locâl, un probleme che si sta interessant la ARLeF e che su chel il diretîf de ACLiF al intint coinvolzi la Regjon pe assegnazion di gnovis risorsis. Par finî, a son stâts presentâts il gnûf logo e il gnûf sît internet de Assemblee “www.aclif.it”.