ARLeF e Comun di Murùs: a ducj i fruts il kit par imparâ a protezisi des “besteatis”

ARLeF e Comun di Murùs: a ducj i fruts il kit par imparâ a protezisi des “besteatis”

A sclarî ai fruts cemût protezisi des “besteatis”, cumò che ben planc si pues tornâ a saltâ fûr di cjase, a rivin Free&Ulli, la moscje simpatiche e il grues crot protagoniscj de gnove iniziative metude in vore de ARLeF – Agjenzie Regjonâl pe Lenghe Furlane. A son i personaçs de schede a fumets par furlan “Free&Ulli e lis besteatis”, distribuide in anteprime ai 250 fruts dal Comun di Murùs intal kit che l’Assessorât aes Politichis sociâls al à prontât pai siei piçui citadins, e che ur à fat rivâ midiant dai volontaris de Protezion Civîl. Intal kit  dal Comun, a son ancje dôs mascarutis che si puedin lavâ e tornâ a doprâ e la “Guida Galattica al Coronavirus”, un librut nassût de colaborazion dai cuatri museus talians dai fruts.A meti in maniere simboliche il prin kit intes mans di Alice, piçule citadine di Breçà, a son stâts il president dal ARLeF, Eros Cisilino, la Sindiche di Murùs, Albina Montagnese e la assessore aes Politichis Sociâls, Manuela Liva.

«Cun grant plasê si sin metûts dongje dal Comun di Murùs in cheste iniziative impuartante – al dîs il president Cisilino -. Il nestri Free&Ulli e lis besteatis al è un progjet realizât di pueste pai plui piçui, doprant la lenghe furlane e il fumet, tant che struments bogns par sclarî – cuntun lengaç sempliç – trop che al sedi impuartant protezisi. O vin sielzût di fâlu cun doi personaçs che i fruts a cognossin, che a animin tantis bielis storiis contadis ancje te trasmission televisive Maman!, e che a son il risultât de creativitât de ilustradore Patrizia Geremia. La schede si pues discjamâle dal nestri sît e o sin daûr a fâ ancje la version video che e sarà promovude intai prossims dîs sui nestris canâi socials. Il nestri obietîf al è chel di rivâ a ducj i fruts dai comuns furlanofons. La promozion de salût doprant la lenghe furlane, al è un dai intervents specifics li che la Agjenzie e je daûr a lavorâ in chest moment, cemût che a dimostrin lis tantis iniziativis metudis in cjamp dutune cu la Protezion Civîl e cu la Direzion Salût de nestre Regjon»

«Cun cheste iniziative, destinade a ducj i fruts fin ai 11 agns – e sclarìs la Sindiche Montagnese – o vin volût rispuindi aes tantis domandis che i nestris fruts si fasin, par che a puedin acetâ e capî miôr i limits e i vincui che cumò a frenin la lôr vivarosetât, la voie di vicinance cun chei altris fruts, e ur disìn: vêt fiducie inte sience, vêt fiducie in nô adults, vêt fiducie in voaltris, parcè che al larà dut ben!».

Tag

Postato il

10 Maggio, 2020

Invia commento

Il tuo indirizzo email non sarà pubblicato. I campi obbligatori sono contrassegnati *