Anade buine per la Assemblee de Comunitât Linguistiche Furlane

,
Anade buine per la Assemblee de Comunitât Linguistiche Furlane

Cetancj Comuns a an aderît a la clape. Prossime iniziative lis cjartis di identitât bilengâls talian-furlan

La La cjarte di identitât bilengâl (talian – furlan) e je la prossime iniziative de ACLiF, la Assemblee de Comunitât Linguistiche furlane, che in te Sierade che e ven e organizarà une cunvigne dulà che a vignaran clamâts a intervignî, a rivuart de lôr esperience, aministradôrs e operadôrs culturâi des zonis dal Stât talian dulà che e vivin altris minorancis linguistichis. Une altre tessare par la costruzion e la trasmission de identitât dal popul furlan, come che dal rest e previôt la leç taliane 482 dal 1999.
La iniziative e ven proponude in ta l’an che la ACLiF e à vût une sdrume di adesions cun 7 Comuns che a son jentrâts a fâ part de Assemblee tacant di zenâr. Risultât de riforme de leç sui ents locâi che e à sblocât tecnichementri lis adesions ae Assemblee, ma ancje des iniziativis inmaneadis dal president Markus Maurmair, sostignût dal Consei diretîf de ACLiF.

La riforme dai ents locâi volude di bande da l’assessôr regjonâl Roberti e à di fat dislaçât la ACLiF da lis UTi e permetût ancje ai Comuns che a vevin in pîts un ricors cuintri la leç istitutive des Unions Intercomunâls di jentrâ in ACLiF cence preocupâsi di pussibilis ripercussions juridichis aministrativis, viodût che UTI e ACLiF a son stadis istituidis de stesse leç e la adesion ae Assemblee e podeve causionâ prejudizis al ricors cuintri de leç” al spieghe Maurmair. Il sfantament di chest berdei no sarès dutcas suficient di bessôl a spiegâ la esplosion di interès par la ACLiF cjalade simpri di plui come un motôr di promozion de identitât furlane: “Spietin ancjemò un pâr di adesions e daspò in tancj Comuns a si inviarà l’ûs de segretarie telefoniche bilengâl talian-furlan che o vin realizât in colaborazion cun Onde Furlane – al anticipe il president de ACLiF – cun di plui o regjistrin il sucès dal telegjornâl par furlan in onde su Telefriuli, partît cun tun spazi di 5 minûts al à dopleât la durade medie ancje par vie che tancj Comuns furlanofons a domandin a la redazion da la emitent spazis informatîfs in lenghe su iniziativis e problematichis. Tant che ACLiF o sin convints che doprant i mieçs di comunicazion, massime fevelant di ce che a interesse a la int in te sô lenghe e si promôf la culture furlane”.

E il furlan in RAI? “A son doi discors paralêi, no o sperin che il telegjornâl su Telefriuli a continui e si slargji magari a altris emitents che a seguissin il stes model, tal stes timp lavorin par otignî par la minorance furlane ce che altris a an bielzà in tal servizi radiotelevisîf public, rivant al stes nivel di ce che e à, al di di vuê, la comunitât slovene” al aferme Maurmair.

Par la adesion di gnûfs Comuns ae ACLiF si spiete cumò il risultâts des elezions aministrativis (Maurmair al smicje di timp ae  adesion di Pordenon, dulà tancj a dan cuintri a  la afermazion de identitât furlane), ma fin di cumò la Assemblee de Comunitât Linguistiche furlane e je un interlocutôr fuart par chel che inten il supuart da la identitât furlane: ARLeF e ents publics organizadôrs a an domandât ae clape di promovi la presince dai sindics dai Comuns partignints a la prossime Fieste de Patrie dal Friûl programade par i 12 di Setembar a Udin dilunc Friuli Doc.

Tag

,

Postato il

9 Settembre, 2021

Invia commento

Il tuo indirizzo email non sarà pubblicato. I campi obbligatori sono contrassegnati *