AL PARTÌS IL TG PAR FURLAN

by | Lui 28, 2021

INIZIATIVE DI TELEFRIULI E ACLIF

Di lunis al 26 di Lui al partìs un gnûf TG in lenghe furlane. Ogni dì, dal lunis al vinars su Telefriuli a lis 8.40 sot sere al va in onde “Gnovis”, un notiziari di 4-5 minûts dut in marilenghe cu lis gnovis dal dì.

L’iniziative a je nassude di une colaborazion tra la emitent Telefriuli e la Assemblee di Comunitât Linguistiche Furlane (ACLiF), par dâ un segnâl fuart par la dignitât da la nestre lenghe. ACLiF (cu la fuarce dai passe 130 Comuns che e rapresente) in chescj mês si è metude in moviment e e à cjatât la disponibilitât plene di entusiasim di Telefriuli, che e à metût la sô organizazion e esperience.

Cussì duncje, dopo i notiziaris da la cjarte stampade e da la radio, che za di agns si fasin in gracie di benemerits gjornaliscj e editôrs, cumò il furlan al rive ancje in television, come che za al sucêt su la television publiche pal sloven, pal todesc e pal ladin.

Al è un altri pas impuartant pal ricognossiment concret (e no dome su la cjarte) da la lenghe furlane.