Udin, ai 10 di Març dal 2021 – Ae fin di Avrîl e varà di jessi rinovade la convenzion pes trasmissions RAI in lenghe furlane. La Assemblee de Comunitât Linguistiche Furlane (ACLiF), che e met adun 128 comuns de regjon, e à organizât ai 13 di Març dal 2021 aes 10.30 une cunvigne al fin di fâ un cuadri des trasmissions radiotelevisivis pes lenghis minoritariis in Italie e individuâ lis pussibilitâts di disvilup de situazion specifiche dal furlan. Un confront a grant rai par podê incuadrâ la situazion dal Friûl intun contest nazionâl, cjapant in considerazion ancje la comunitât slovene, todescje, ladine, francese e sarde.
L’avigniment, patrocinât di RAI, Regjon Friûl Vignesie Julie, ARLeF e Societât Filologjiche Furlane, cu la colaborazion dal Corecom, al sarà mandât in direte streaming.
A fâ di moderadôrs, il president di ACLiF Markus Maurmair (sindic di Voleson Darzin) e la conseire Ornella Comuzzo (assessore di Tavagnà). “La cuistion linguistiche – al sclarìs Maurmair – e je cetant impuartante, parcè che al dì di vuê, vignudis mancul lis cuistions politichis che a àn determinât la nassite de Regjon autonome intal 1963, la specialitât dal Friûl Vignesie Julie e à la sô fondamente inte diversitât, pe compresince storiche di comunitâts talianis, furlanis, slovenis e gjermanichis. E par difindi cheste ricjece, il rûl dai mieçs radiotelevisîfs al è fondamentâl”.
La cunvigne e viodarà la partecipazion di esponents di prin plan dal gjornalisim e de RAI, tacant di Ferruccio Sepe, cjâf Dipartiment pe informazion e la editorie de Presidence dal Consei dai Ministris, e Stefano Luppi, diretôr Relazions istituzionâls de RAI. A intervignaran ancje Antonella Eloisa Gatta, vicepresident dal Corecom FVJ, Guido Corso, diretôr de sede RAI di Triest, William Cisilino, diretôr de Agjenzie regjonâl pe lenghe furlane, Martina Repinc, responsabil de struture programs in lenghe slovene de RAI di Triest, Vittorio Longati, diretôr de sede RAI di Bolzan, Stefan Pescollderungg, prin redatôr dal Tg RAI Ladinie, Luciano Caveri, assessôr regjonâl de Val di Aoste (za responsabil de struture programs RAI di Aoste), Francesco Angelo Siddi, president di Confindustrie Radio Televisions (za conseîr Corerat de Sardegne). La Regjon e sarà rapresentade di Pierpaolo Roberti, assessôr regjonâl aes Autonomiis locâls, e di Piero Mauro Zanin, president dal Consei regjonâl.